چووم بۆ دیتنی فارێنهایت 9\11 ... 6 ساڵ بوو سه‌ره‌گڕتنه‌وه بۆ دیتنی فیلمم نه‌دیتبوو، ئه‌وه ئه‌وه‌شم لێره دیت! چووم ساعه‌ت 6 فیڵمه‌كه ببینم، بلیتی ساعه‌ت 6:30 ده‌فرۆشرا ، كه سه‌ره‌م گڕته‌وه بۆ كرینی بلیتی 6:30  ئه‌ویش پێش ئه‌وه‌ی بگاته من ته‌واو بوو و ئه‌وجار بلیتی 7:40 فرۆشرا... ئاخری به جیڕه‌ جیڕ بلیتێكی 7:40م ده‌ست كه‌وت... تازه خوا چاكه‌یان بۆ بكات كه له‌ 5 ساڵۆنی ئه‌م سینه‌مایه چواری هه‌ر ئه‌م فیڵمه‌ی هه‌بوو!

دوێنێ لێره ڕۆژی ده‌نگدان بۆ هه‌لبژاردنی ده‌وڵه‌تی فێدێڕاڵ بوو و گۆیا مایكڵ مۆر به په‌له په‌ل فیڵمه‌كه‌ی ناردبوو كه پێش ده‌نگدان، فیڵمه‌كه ڕای خه‌ڵك بگۆڕێ نه‌كا كانسێرڤاتیڤه‌كان(پارێزه‌ران) سه‌ركه‌ون! ده‌ی خه‌ڵكیش چوون بۆ دیتنی فیلمه‌كه‌ی و زۆڕتر له هه‌موو فیڵمێك تا ئێستا بینه‌ری هه‌بووه و هه‌روه‌ها پارێزه‌رانیش سه‌ر نه‌كه‌وتن!
(پێم خۆش بوو پارتی پارێزه‌ر سه‌ر نه‌كه‌وتن به تاێبه‌ت ئه‌وه‌ی گه‌ڕه‌كی ئێمه! له خۆیان ئێسك گڕانتر و خوێنتاڵتر نییه... به تاێبه‌ت نوێنه‌ری گه‌ڕه‌كی ئێمه!... لێره باوه كه ئه‌م نوێنه‌رانه بۆ ده‌نگ هێنانه‌وه ، پێش كێبه‌ركێی ده‌نگدان ماڵ به ماڵ ده‌ڕۆن و خۆیان به خه‌ڵك ده‌ناسێنن... ئاوا بوو كه منیش ئه‌م نوێنه‌ره‌ی كانسێرڤاتیڤی گه‌ڕه‌كی خۆمانم ناسی! هه‌رچه‌ند حیزبه‌كانی‌تریش زۆر باشتر له ئه‌وان نین، هه‌ر قسه‌ زله‌كانیان خۆشتره و هیچیتر...) 
 
فیڵمه‌كه هه‌ر وه‌ك هه‌موو فیڵمه‌كانی "مایكل مۆر" بوو، نه زیاتر نه كه‌متر!  وه‌كوو فیڵمه‌كانیتری كه به شێوه‌ی به‌ڵگه‌یی(داكیومێنتری) ساز كراوه هه‌ڵگری ڕه‌خنه‌ی توند و تیژی مایكل مۆره دژی سیاسه‌ته‌كانی ئه‌وا‌نه‌ی بۆ به‌رژه‌وه‌ندی خۆیان به شه‌وێك دونیا تێك ده‌ده‌ن! شتێكی له فیلمه‌كانیدا گرینگه ئه‌وه‌یه كه مایكل مۆر وه‌ك ئامریكاییه‌ك پرسیار ده‌كا نه‌ك مرۆڤێك كه ده‌توانێ خه‌ڵكی هه‌ر شوێنێك بێ وه یان له پێناو مرۆڤایه‌تی... هه‌ر به‌م پێناسانه‌ی بۆ ئامریكاییه‌ك تاریف كراوه وه‌ڵامی ده‌وێته‌وه...هه‌ڵبه‌ت ئه‌گه‌ر كه‌سێك هه‌بێ وه‌ڵامده‌ره‌وه بێ!
چون مه‌نتقێكی هاسان بۆ دارژتنی پرسیاره‌كان به كار دێنێ و له بیری ناچێ كه جار و بار بیكاته گاڵته و فشه، بۆیه هه‌موو كه‌س له فیڵمه‌كانی ده‌گه‌ن و پێیان خۆشه... ڕه‌نگه بۆیه فیڵمه‌كانی ئه‌وه‌نده بینه‌ری هه‌یه... 
به‌ڵام فیلمی فارێنهایت 9\11 دوپات كه‌ره‌وه‌ی كتێبی پارێتی به ناوی dude, where is my country? ... ئه‌وانه‌ی ئه‌م كتێبه‌یان خوێندۆته‌وه كاتی دیتنی فیلم ئه‌م دووپات بوونه‌وه‌ی هه‌ست پێده‌كه‌ن.... به‌ڵام بڵێی كتێبه‌كه ئه‌وه‌نده خوێندرابێته‌وه كه فیلمه‌كه ده‌دیترێ؟ بۆ ئه‌وانه‌ی تاقه‌تی كتێب خوێندنه‌وه‌یان نییه فیلمه‌كه هه‌ر 2 ساعه‌ت ده‌خایه‌نێ ئه‌گه‌ر وه‌ك منییان به سه‌ر نه‌یه!
له بیرم چوو بڵێم: ئه‌م فیلمه ده‌ستپێكێكی جوانی هه‌یه، ده‌ستپێكێك كه ئه‌م فیلمه له فیلمێكی به‌س به‌ڵگه‌‌ییی جیاوازده‌كاته‌وه.... كاتێك ئه‌وانه‌ی  ده‌رهێنه‌ری فیلم هه‌ڵسوكه‌و‌تیان هه‌ڵده‌سه‌نگێنێ یه‌ك به یه‌ك وه‌كوو ئارتیستێك خۆیان ده‌رازێننه‌وه بۆ ده‌سپێكردنی شانۆیه‌كی كه هه‌ر خۆیان ده‌زانن چۆن كۆتایی پێدێت ... دوابه‌دوای ئه‌م ڕازاندنه‌وانه فیلم ده‌ستپێده‌كات!
ئه‌مه‌ش به‌شێك له كلیپه‌كانی!

له نێو وێبڵاگان دا كه ده‌گه‌ڕێی ده‌بینی هێندێك ناوی ئاشناش خه‌ریكی وێبڵاگ نووسینن! ئه‌وه‌ش وێبڵاگی " نوام چامسكی" به ناوی Turning the Tide

ئێوارێ باران ده‌باری...
بارانی هاوینی ده‌نك درشت ... هه‌موو ئاسفالتی شه‌قامه‌كان ده‌دره‌وشانه‌وه، له به‌ر باران شار جوان ببو..
هاتم باسی جوانی بارانت بۆ بكه‌م، باسی تروسكه‌ی ئاسفالتی ڕه‌ش .. هاتم بۆ لای كامپیوتێر كه بۆت بنووسم ... وه‌بێرم هاته‌وه تۆش هه‌ر خه‌یاڵێكی، هاورێی ئینتێرنێتی من!  

ده‌ی سه‌لامو‌ن عه‌له‌یكوم‌!
دیتم گوڵه‌گه‌نم وا بێوازه ئاگر له جگه‌رم به‌ربوو. گووتم ده‌بێت هه‌ر خۆمی بگه‌یه‌نمێ. به‌خوا باوكم ناهه‌قی نییه تاقه‌تی ئه‌و وڵاته‌ی لای مه‌ی نینه. به‌هه‌ر‌حاڵ وا ئێستا لای ئه‌و خانم گوڵه‌م و بۆ خۆم چوارمشقی دانیشتووم و به به‌رمیل چای گه‌رم هه‌ڵده‌قوڕێنم. كه‌سێك نییه بڵێ مردووت مرێ به‌م هاوینه‌ و چای گه‌رمی چی. ئیدی بۆ خۆمان قسه‌و غه‌یبه‌ت ده‌كه‌ین. بۆ هه‌ندێك كه‌س: هییییی ئێره هه‌وا گه‌رمه‌ و خۆره!!!
تۆ چاو چه‌نده نه‌دید به‌دیدم. هه‌ندێك شتی دی ڕوویداوه به كه‌س ناڵێم. بۆ نمونه ئه‌مڕۆ جلمان شت و له‌سه‌ر ئه‌وه‌ی تی شێرته سووره‌كه‌ی من له كوێ هه‌ڵواسرێت گفتوگۆیه‌كی زۆر قوڵ و درێژخایه‌ن ڕوویدا، له كۆتاییدا به خواردنه‌وه‌ی په‌رداخێك ماستاو كۆتاییمان به گفتوگۆكه‌ هێنا و بڕیارمان دا كه تیشێرته‌كه‌ی من له نێوان تیتۆڵێكی سپی و سه‌وز و زه‌ردا هه‌ڵواسرێت. كوردین هه‌موو، كوردین هه‌موو، ترالالا....
ژیان له نهۆمی 17ه‌شدا خۆشه، لێره یان ده‌گه‌مه خوا یان خۆم ده‌كوژم ئه‌گه‌ر دڵم بشكێنرێت.
تۆ سه‌یری منی كۆپه هه‌رگیز خانوبه‌ره‌ی ئه‌وه‌نده به‌رزم نه‌دیتبوو هه‌ر كه گه‌یشتم و نه‌گه‌یشتم ویستم بچمه سه‌ربانه‌كه و له‌وێ ئاڵای وێبڵوگاوا داچه‌قێنم و وێنه‌یه‌كی خۆمیش به‌و سه‌ربانه‌وه بگرم. وێنه‌ی خۆم له‌گه‌ڵ چاویلكه‌یه‌كی ڕه‌شی ئه‌ستوری قه‌راغ زیوین و پانتۆڵ و چاكه‌تی خوریدار و ئیدی ئه‌و به‌ندو به‌ساته. تا گوڵه‌گه‌نم به گوێچك هێنامیه‌ خوارێ و گووتی تازه تۆ مافت به‌سه‌ر ئه‌م ئاواییه‌وه نه‌ماوه، ده‌ی بۆ خوارێ. منیش لچ و لێوارم شۆڕ بووه‌وه وه‌كو كاسه‌ی كه‌ل. هێنده هاوار و زیركاندم تا دڵی نه‌رم بوو ڕوحمی پێكردم و ئه‌وه كلیلی ماڵه‌كه‌ی له لامه. ده‌ی ئه‌وه بانگم ده‌كات بزانم كاممان له تاوڵه‌دا زیره‌كین. ئه‌گه‌ر په‌شیمان نه‌بێته‌وه دوای دێمه‌وه خزمه‌تتان.

په‌ریله‌
( خۆ خه‌یاڵ كه‌سی نه‌كوشتووه!)

هه‌وه‌ڵ جار نییه ده‌ێبینم، هه‌موو جارێ له كلاسه‌كه له لای چه‌په‌م ڕاده‌وه‌ستێ... به‌قه‌د بزه‌یه‌ك یان سه‌ر ڕاوه‌شاندنێك به نیشانه‌ی سڵاو ئاشناین! به‌ڵام ئه‌مجار له‌م ژوره بچووكه‌دا به‌رانبه‌ر یه‌ك دانیشتووین، بزه‌یه‌ك دێته سه‌ر لێوان، له خوامه سه‌ری قسان نه‌كاته‌وه بۆیه چاوه‌كانم ده‌قووچێنم! تاوێك دوایه چاوم هه‌ڵدێنم ده‌بینم چاوه‌ڕێی ئه‌وه‌یه و ده‌ڵێ: سڵاو، ببوره قسان ناكه‌م ، من كه‌ڕم و هیچ نابیستم...
نازانم چ بڵێم، كه‌مێك شه‌رمێ ده‌كه‌م، ئه‌و پێی وایه دوو كه‌س له ژورێكی بچووك دا ده‌بێ ده‌ست به قسان بكه‌ن و ئه‌و ده‌بێ پێم بڵێ هۆێ قسه‌ نه‌كردنی چییه ده‌نا جوان نییه! منیش تاوێك پێش خۆم له قسان ده‌پاراست بێ هیچ هۆیه‌ك!
...................................

ئه‌مرۆ  پرسیت بۆ هیچ له گوڵه‌گه‌نم ناقه‌‌ومێ؟
گوتم بێتاقه‌تم...
بێتاقه‌تی به‌هانه‌یه، خۆ لادانه و هیچی تر...

كوردۆ خه‌ریكه ڕێكخراوه‌یه‌ك بۆ بڵاگچیانی كوردی ئینگلیسی‌نووس پێك بێنێ، هه‌ر كه‌س ئینگلیسی بۆ دێت خۆی و وێبڵاگی خۆی بناسێنێ به كوردۆ... به‌س شتێكی من تێیناگه‌م ئه‌وه‌یه: ئه‌م بڵاگنووسانه ده‌بێ هه‌ر باسی سیاسه‌ت بكه‌ن یان هه‌رچی بنووسن هه‌ر حه‌ڵه؟
پار و پێرار منیش ده‌ستم پێكرد به ئینگلیسی بنووسم به‌ڵام زوو وازم هێنا، له لانێكه‌وه به ئینگلیسی نووسین بۆ خۆم باش بوو، هه‌ر ئه‌و جوره‌ی به كوردی نووسین زۆر شتی له بابه‌ت زمانی كوردیه‌وه فێر كردم، ڕه‌نگ بوو نووسین به ئینگلیسیش یارمه‌تیده‌ری زمانی ئینگلیسیم بێ، به‌ڵام وازم هێنا... ته‌مه‌ڵی و 1000 ده‌ردی بێده‌رمانیتر...  ئێستاش نه‌چۆ بچێ ئه‌وه كوردۆ و ئه‌وانیتر ئیمه ده‌ناسێنن به دونیای وێبڵاگ! هیوادارم هه‌ر وا به‌رده‌وام بن.
دونیا ئێستا به هۆێ مێدیای به‌ربڵاو وه‌ك ئینتێرنێت زۆر بچووكتر بۆته‌وه، سه‌ربه‌ستی به كار هێنانی ئه‌م مێدیایه ئه‌وه‌نده زۆڕه كه زۆڕێك له سیاسه‌ته‌كانی دونیای تووشی ئاڵ و گۆڕ كردووه، بۆ وێنه هه‌ر له شه‌ڕی ئامریكا و ئێراق، سه‌ربه‌ستی ئینتێرنێت زۆر شتی داپۆشراو وه‌ك ئه‌و كاره‌ساته‌ی له زیندانی ئه‌بوو غه‌ریب قه‌وما، به دونیای ناساند... ئه‌وه لانی باشی به كار هێنانی ئه‌م مێدیایه‌یه.
ڕه‌نگه نووسینی كورده‌كان به ئینگلیسی كه زمانی ئینتێرنێته، ئه‌و هه‌له‌ی پێكبێنێ بۆ كردنه‌وه‌ باس و خواسێكی چه‌ند لایه‌نه له سه‌ر ئه‌وبابه‌تانه‌ی ئێمه به‌ لامانه‌وه گرینگه!
به‌ڵام گرفتێكی من ده‌گه‌ڵ به زمانیتر نووسین له جێی(نه‌ك ده‌گه‌ڵ) به كوردی نووسینم هه‌یه ئه‌وه‌یه كه: كورد ئه‌وه‌نده‌ی بۆ ئه‌وانیتر قسان ده‌كا بۆخۆی قسان ناكا؛ ئه‌وه‌نده‌ی به ته‌مایه خۆی به ئه‌وانیتر بناسێنێ، خۆی بریارێ نادا خۆی بناسێ؛ ئه‌وه‌نده‌ی چاوه‌رێی ده‌ستگرتن و یارمه‌تی ئه‌وانیتره خۆێ حه‌وڵ نادا خۆێ ڕزگار بكات... ڕه‌نگه ئه‌وانه هۆی ئه‌و بازنه داخراوه بێ كه كورد تێیدا دێ و ده‌چێ بێ ئه‌وه‌ی ڕزگار بێ.