ڕۆژێك كه به وێبڵاگ ده‌ست پێ ده‌كا نابێ به هیوای بی.. ئه‌گه‌ر له خه‌و هه‌ستای و رۆژه‌كه‌ت به ئاخر ده كامێنتی وێبڵاگئاوا ده‌ست پێ كرد یانی 2-3 ساعه‌ت دوایه‌ش ئه‌وه هه‌ر خه‌ریكی ئه‌م لینك و ئه‌و لینكی...
ده‌ی ها ئه‌وه چه‌ند رۆژه چاوت خافڵ كردووه له دیتنی شته تازه‌كانی ئێره، ده‌بینی ئه‌وه ته‌وار شتێكی تازه‌ی نووسیوه و تازه ده‌زانی ئه‌و دوو ئیمه‌ێله‌ی بۆی ناردووی باسی چییه! ده‌بینی ئه‌وه به‌رده‌قانی ماڵه‌كه‌ی هه‌ڵگرتۆته‌وه و كه‌مێك له ڕوحی خۆشی تێدا به جێ هێشتووه... هه‌ر جاره‌ی دیزاینه‌كانی ده‌بینم ده‌ڵێم بێ یه‌ك و دوو به‌رده‌قانی باشترین وێب دیزاێنێری  كورده! پێویست نییه هه‌موو دیزانێره كورده‌كان بناسم! كه‌مێك ئه‌وبه‌رتر ده‌بینم ئه‌وه كه‌زوان له به‌ره‌ڵایه‌تی ناو وێب دیاریه‌كی تازه‌ی بو  هێناوین وه‌ك هه‌میشه سه‌ره‌نج راكێش، خۆتان بڵێن دیاری ئه‌م جاره‌ی جوان نییه؟... هه‌ر كاته‌ی كه‌سێك ئادره‌سی ماڵپه‌رێكی جوانی كوردی ده‌وێت من ماڵی كه‌زوانی ده‌ده‌مێ ده‌ڵێم لینك به لینك چاوی لێبكه!
دراوسێ نوێ زۆر بوون جار و بار لێكییان ناكه‌یه‌وه به تاێبه‌ت كه هه‌موو تێمپلێتی وه‌ك یه‌ك داده‌نێن و كرته ناكه‌نه سه‌ر تێمپلێته‌كانی به‌رده‌قانی تا كه‌مێك ئاڵ و گۆڕێ بده‌نێ!
له‌م ناوه‌دا ده‌ر و جیران كه له گه‌ڕه‌كی پرسیه‌ن بڵاگ را هاتوون زۆر بوون، پێم وایه له ناو بڵاگێره‌كان دا له هه‌موان قۆڕتر هه‌ر ئه‌و پرسیه‌ن بڵاگه‌یه! تا بڵێی به كاوه‌خۆیه و تێمپلێته‌كانی نارێك و قۆڕس و ناڵه‌بارن، 4 ساعه‌ت ده‌بێ راوه‌ستی تا كابرایه‌كی ناشیرینی خوێن تاڵ داوات لێبكات تا له بنان گوێ‌ راكێشی... ئه‌رێ كورده‌كان، چییتان له پرسیه‌ن بڵاگ دیتووه ئاوا پێوه‌ی نووساون؟
ئه‌م" هه‌رێمی هیچ"ه‌ش دیاره له به‌ر هیچی زۆری شت پێیه، ناكرێ نه‌ێخوێنییه‌وه كاتی سه‌ردانی وێبڵاگئاوا ده‌كه‌ێ... كه‌مێك ئه‌و‌به‌رتر ئه‌م دراوسێ نۆیه‌ش رێگایه‌كی باشی بۆ نووسراوه‌كانی دیتۆته‌وه له وێبڵاگ ئاوا، له سه‌ر بابه‌تێكی نووسیوه كه "به‌ بێ پرسی نووسه‌ر یان وه‌رگێڕ هیچ كه‌سێك مافی له‌ چاپدانی ئه‌م وتاره‌ی نییه‌!" لام وایه ئه‌م یاسایه هه‌ر ئه‌م نووسراوه تاێبه‌ته ناگرێته‌وه و هه‌ر نووسراوه‌یه‌ك له هه‌ر بڵاگێك دا داده‌ندرێ، به بێ ئیزنی نووسه‌ر نابێ كه‌ڵكی لێ وه‌رگیرێ... ئه‌مه له یاسای كۆپی ڕاێتی خودی بڵاگێر دا هه‌یه... باشه له ئه‌م یاسایانه بزانین و خۆشمان به كاری بێنین. لام وایه یه‌كێك له گرفته‌كانی ئێمه له سه‌ر وێب ئه‌مه‌یه هیچ رێزێك بۆ ئه‌م مافه‌ی هه‌مانه دانانێین، واته هه‌ر نووسه‌ره‌كان ئه‌م مافه‌ی خۆیان ده‌خه‌نه ژێر پێ، بۆ وێنه نووسراوه‌ی خۆیان بۆ هه‌ر ماڵپه‌ڕێكی هه‌یه ده‌نێرن و داوایان ئه‌وه‌یه هه‌موو  ماڵپه‌ڕه‌كان هه‌مان نووسراوه بخه‌نه سه‌ر لاپه‌ڕه‌كه‌یان!
قسه‌و باس زۆره له سه‌ر ده‌ر و جیرانان به‌ڵام ناكرێ هه‌مووی به جارێك بڵیی...
تا رۆژ ته‌واو نه‌بۆ بچم كه‌مێك بژیم!

ساڵی نه‌هاته.........

دوو ساڵ پێش كوژرانی فادیمه شاهینداڵ زۆر په‌رۆشی كردم...
هی ئه‌وه‌ی نه‌بوو كه هه‌وه‌ڵ جارم بێ ببیسم مافی ژیانی ئینسانێك وا به هاسانی پێشێل ده‌كردرێ...
هی ئه‌وه‌ی نه‌بوو بۆ هه‌وه‌ڵ جار ببیسم ژنێك به ده‌ست كه‌س و كاری خۆی ده‌كوژرێ....
هی ئه‌وه‌ی نه‌بوو بۆ هه‌وه‌ڵ جار هه‌ست بكه‌م پێوانه‌كانی ئێمه‌ی مرۆڤ چه‌ند بچووكن و چه‌ند هیچن...
هی ئه‌وه‌ی نه‌بوو كه زه‌ق كردنه‌وه‌ی كوردان له لایه‌ن مێدیاكانی سوێدی منی وه‌خۆ خستبێ...
به‌س هی ئه‌وه‌ی بوو كه هه‌ستم كرد تێكۆشانی كچێك كه خۆی به قوربانی سیستێمێكی هه‌ڵه ده‌زانی ، بۆ دیتنه‌وه‌ی سه‌رچاوه‌كانی هه‌ڵه و رزگار بوون لێی ، سه‌ركووت كرا ... ئه‌ویش به ده‌ست قوربانییه‌كی تر!

فادیمه كوژرا، خه‌لكی سوید و به‌شێك له كوردان چیرۆكی فادیمه‌یان بیست و ره‌نگه فرمێسكیشیان بۆ هه‌ڵوه‌راند... رۆژیاد و ساڵیاد و كۆڕ و كۆمه‌ڵیشیان بۆ گڕت و ده‌ێگێرن... ژنه‌كانی تر هاواریان كرد ئێمه‌ش هه‌ین و پیاوه‌كانیش به ژنیان هه‌ڵكووت و ناسكی ژن و جوانی ژن و په‌ری بوونی ژن و بێچاره بوونی پیاو بێ ژن...و.... كه‌س له بیری نه‌ما ژن ئینسانه!

پێم حه‌یف بوو كه فادیمه كوژرا چوون ئه‌و بڕوای به ئینسان بوونی خۆی هێنا بوو...زۆر كه‌من ئه‌م ژنانه‌ی ئه‌م بڕوایه‌یان هه‌بێ... یان ئه‌وه‌نده وێرا بن بیسه‌لمێنن كه بڕوایان هه‌یه!

ئێستا كه بۆ هه‌وه‌ڵ جار ئه‌م وتاره‌م خوێنده‌وه، زۆرتر داخدار بووم بۆ كوژرانی فادیمه... خۆی باشی بۆ چووبوو، ئه‌و هه‌ر قوربانی پیاوسالاری یان داب و نه‌ریتی پاشكه‌وتوو یان بێ ده‌ست‌هه‌لاتی نه‌بوو...
قوربانی هه‌موو ئه‌وانه + ......

.....................................
ئه‌مه‌ش بۆ تۆ:

وه‌ره دونیا دابه‌ش بكه به ڕه‌نگی پێستییان... بلێ زه‌رد، سپی، سوور، ڕه‌ش یان بۆر... هه‌ر كامییان به سه‌ر ئه‌وانی تر دا زاڵ بوو و به مافی خۆی زانی به سه‌ر ئه‌وانیتر دا حوكمێ بكا و به ماڵ و مڵكی خۆیان بزانی، ناوی بنێ ڕه‌گه‌ز په‌ره‌ست...

وه‌ره ئێستا دونیا دابه‌ش كه به كورد و تورك و فارس و عه‌ره‌ب و رووس و سڵۆواك و سپانیش و...هه‌ر كامییان به سه‌ر ئه‌وانی تر زاڵ بوو و و به مافی خۆی زانی به سه‌ر ئه‌وانیتر دا حوكمێ بكا و به ماڵ و مڵكی خۆیان بزانی، ناوی بنێ ڕه‌گه‌ز په‌ره‌ست ...

ئێستا بۆ ئه‌گه‌ر من ده‌ڵێم پیاوسالاری دونیا دابه‌ش ده‌كا به ژن و پیاو و پیاو به سه‌ر ژن دا زاڵ ده‌زانی و ژن به ماڵ و مڵكی پیاو ده‌زانێ، تۆ ناهێڵی ناوی بنێم ڕه‌گه‌زپه‌ره‌ست و راسیست؟
مه‌گه‌ر هه‌موو ئه‌م ڕه‌گه‌زپه‌ره‌ستانه هه‌ر مافی ئینسانی ئه‌وانیتر پێشێڵ ناكه‌ن؟ یان ڕه‌نگه پیاوسالاری له ڕه‌گه‌زپه‌ره‌ستیش پیستر بێ؟؟

دیمانه به شێوه‌ی نوێ ده‌ستی پێكرده‌وه ....

كه‌مێك له وێبڵاگی گشتی ناچێ؟ كاكه شه‌رمێ مه‌كه‌ن ده‌توانین ناوتان بخه‌ێنه ریزی وێبڵاگه‌كانه‌وه!
ئا مه‌جید و ئه‌وانیتر كه ته‌حه‌موولی ئامه‌جیدیان كردووه ده‌ست و چاویان خۆش!

ئه‌وه‌ش وه‌ڵامی پرسیاره‌كه‌ی خۆم... بژی قامووس!

كوتن: ووتن، گۆتن، گۆهتن، مووشن، وه‌شن، ویشتن، (كه‌ل.) ئوشن، ڤتن، مییه‌ن، بێژتن، بێژان، واتن، ویژتن، واته‌ی، هووڵتن
+ گووتن، كووتن، گوتن، ووتن، وتن، وه‌تن

كه وایه مه‌چكۆ تۆش راست ‌ئێژی ...

هه‌ر بڵێن كوردی زمانێكی ده‌وڵه‌مه‌ند نییه!!!!

گووتی

ئه‌رێ پرسیارێك:
گووتی
ووتی
كووتی
كامه‌یان درووسته؟ من ده‌نووسم گووتی، به‌ڵام خۆم ده‌ڵێم كووتی..." گووتی" وه‌بیر "ئامین ده‌لێم"م ده‌خاته‌وه كه ده‌هات بۆ نان كردن، مه‌نگوور بوو و چوون زوو زوو ده‌ێگووت (ده‌ێكووت، ده‌ێووت؟) "ده‌لێم"به لێی ناسك، ئه‌و نێوه‌مان(منداڵه وركه‌كان!) به سه‌ردا بریبوو... به‌ڵام قسه كردنی زۆر خۆش بوو.
له كوردستانی "گیوی موكریانی" دا گه‌ڕام، " كووتن " نه‌بوو، به‌ڵام له به‌رانبه‌ر "گووتن" نووسرابوو "كووتن"، له به‌رانبه‌ر "ووتن" نووسرابوو "گووتن"...
كه واته هه‌موو سه‌ر وقوونی یه‌كن! له به كار هێنانی كاتی قسه كردن گه‌ڕێین، كامه‌یان بۆ نووسین باشتره؟؟؟
........................................................

سه‌رمایه‌كی سه‌یره، هه‌موو په‌نجه‌ره‌كان له ژووره‌وه سه‌هۆڵ داێپۆشییوه... ئه‌وه به‌راست لێمان بوو به كانادا ... ناوێرم له ژوورێ وه‌ده‌ر كه‌وم...34 ده‌ره‌جه ژێری سیفر شۆخی نییه!! سه‌ێر ئه‌وه‌یه ئه‌ورۆ تاوێكی خۆش و ئاسمانێكی شین و جوان هه‌ڵیده‌فریواندی... ئه‌و رۆژه جوانانه له زستان دا هه‌میشه ساردترین رۆژه!
.......................................................

ده‌ڵێن پارتی و یه‌كێتی رێك كه‌وتوون و ئیداره حكوومه‌تێكانیان ده‌بێته‌وه یه‌ك.... ده‌ڵێن قه‌وڵ وایه كۆمه‌له و دێمۆكرات به‌ره‌ی كوردستانی پێك بێنن... من هێشتاش بۆم روون نه‌بۆوه شه‌ری ئه‌وانهله هه‌وه‌ڵه‌وه له سه‌ر چی بوو؟ ( ئه‌گه‌ر كه‌سێك به ته‌مای وه‌ڵامه، تكایه خۆی تێكه‌ڵی هیچیان نه‌بێ چوون من له قسه‌ی ئه‌وان حاڵی نابم و سوودی نییه و هه‌ر پرسیاره‌كه ده‌مێنێته‌وه!)

بیر ده‌كه‌مه‌وه ئێستا كه رێك كه‌وتن مۆده بزانم له كێ زیز بووم ، منیش بچم یه‌خه‌ی بگرم و دانیشین قسه له ئاشتی بكه‌ین... كه‌س به بیرم دا نایه... بڵێی كه‌س له من زیز بێ؟ فه‌رموون با ئاشت بینه‌وه!

كه‌س نه‌بوو؟؟؟

هه‌وه‌ڵ كلاسی كوردی له تۆرێنتۆ دامه‌زراوه، ئه‌م هه‌واڵه‌م له رۆژنامه‌ی فارسی دا دیت... قه‌وڵ وایه ئه‌م كلاسانه له 10ی مانگی یه‌ك را ده‌ست پێ بكات. ئه‌م دایك و باوكانه‌ی پێیان خۆشه مناڵه‌كانیان كوردی فێر بن ده‌توانن به‌م ژماره ته‌ڵیفونه و ئیمه‌ێڵه‌ی ژێره‌وه له باره‌ی ئه‌م كڵاسانه بزانن... هه‌ڵبه‌ت ئه‌گه‌ر كه‌سێك هه‌بێ و له تۆرێنتۆ ئه‌م وێبڵاگه بێته به‌ر چاوی!!!

tel: 416-293-1848

Email: zanehro@hotmail.com
یان رۆژی شه‌نبانه كاتژمێری 9:30 تا 12 به‌یانی بچنه ئادرسی ژێره‌وه:

International Pauline Johnson
Junior Public School
35 Dummuray BLVD Agincourt ON
Class room number 5A
Tel:416-396-6510

.........................................................
وا بزانم فارسه‌كان نزیك به 10 رۆژنامه و گۆڤاریان هه‌یه ، نزیك به 4 به‌رنامه‌ی تێلێڤیزیونیان هه‌یه، 20-30 كۆمه‌ڵ و رێكخراوه‌یان هه‌یه، نازانم چه‌ند كاناڵی رادیۆیان هه‌یه چوون گوێ له رادیۆ ناگرم!
كورده‌كانیش بۆ هه‌موو پێداویستییه‌كانیان ده‌سته و دامانی ئه‌و مێدیا فارسییانه ده‌بن چوون هێچ مێدیایه‌كی كوردی لێره نییه.. هه‌تتا كورده‌كانی باشوور و باكوریش ده‌سته و دامانی ئه‌وان ده‌بن!

هه‌موو ئه‌م رۆژنامانه به لاش بڵاو ده‌بنه‌وه له سه‌ده‌قه سه‌ری ئه‌م ڕه‌شبه‌ڵه‌كه بێ مێدیایه‌، تا ئه‌وان هه‌ن نانی ئه‌م براده‌رانه نابڕێ...
بۆیه سه‌یر نییه بۆ زانینی كاتی رۆژی كۆمه‌له و 2ی رێبه‌ندان و هه‌ڵپه‌ركێ پارتی و یه‌كێتی و كۆبوونه‌وه‌ی كورده‌كانی باكوور، وه‌رگرتنی رۆژنامه‌ی فارسیت له كیس نه‌چی، تا بزانی كورد جه‌ماعه‌تی كانادا خه‌ریكی چین...

به‌خوا ئه‌وه خودموختاری نییه نه‌تده‌نێ، ئه‌وه‌ی بۆ ئه‌وان هه‌ڵده‌كه‌وێ بۆ كورده‌كه‌ش هه‌ڵده‌كه‌وێ به‌ڵام به‌ده‌خاوه...!
.........................................................

له براده‌رێكی كوردیان پرسی: خاڵه ئه‌وه 2-3 ساڵه له كانادا ده‌ژی، ده‌گه‌ڵ زمانی ئینگلیزی چۆنی؟ فێری بووی؟
وه‌ڵام ده‌داته‌وه: وه‌ڵا كاكه له ئینگلیزی هیچ سه‌ره‌و به‌ره‌ی ده‌ر ناكه‌م، به‌ڵام له‌وه‌تی هاتوومه ئێره فارسێه‌كه‌م به‌قه‌وه‌ت بۆ!
‌

گووتی: نه‌نه خه‌یاڵیش بۆخۆت سڵامه‌ت...
نه‌نه خه‌یاڵیش مرد!.. هه‌رچه‌ند زۆر له مێژ ساڵه هه‌موو چاوه‌رێی رۆیشتنی ده‌كه‌ن به‌ڵام دیسان بیستنی خۆش نه‌بوو...
هه‌ر جاره‌ی لێمان ده‌پرسی نه‌نه ته‌مه‌نت چه‌نده؟ ده‌یگووت: رۆڵه چووزانم خۆ نازانم كه‌ی له داییك بووم، خۆ قه‌ت داییك و باب و خزمی خۆم نه‌دیتووه بزانم كه‌ی بووم؟
ده‌ڵێن 100 ساڵی له مێژ بوو تێپه‌ر كردبوو به حیسابی ئه‌م‌ شناسنامه‌ی كه خۆی به پێی خۆی وه‌ریگرتبوو... نه‌نه خه‌یاڵ كتێبێكی مێژووی زیندوو بوو ...

بۆخۆی ده‌ێگێراوه كه ئه‌و كاته‌ی ده‌چێ بۆ شناسنامه وه‌رگرتن ژنێكی ته‌واو بۆ و كابرای میرزا نێوی ده‌پرسێ، ده‌ڵێ ناوم خه‌یاڵه، كه داوای ناوبانگ و بنه‌ماڵه‌ی ده‌كا، ده‌ڵێ كه‌سم نییه نازانم هی كام بنه‌ماڵه‌م... كابرا چاوی لێده‌كا و له به‌ر جوانی ئه‌و ناوی ده‌نێ " خه‌یاڵی قه‌شه‌نگی" ...
 ده‌ێگووت به زه‌حمه‌ت وه‌بیرم دێت مناڵێكی 4 ساڵانه ده‌بووم ئه‌وكات كه جیرانه‌كانمان دوای مردنی داییك و بابم، شه‌وێ منییان به كۆڵی براكه‌م به‌سته‌وه و به‌ڕه‌یان كردین بۆ لای شار، نه‌كا مامه‌كانمان له سه‌ر ئیرس و میراس بمانكووژن... له شار براكه‌م منی له به‌ر ده‌رگای مزگه‌وت به جێ هێشت و خۆی رۆێشت و قه‌ت نه‌مدیته‌وه...
بنه‌ماڵه‌یه‌ك هه‌ڵی ده‌گڕنه‌وه و تا ئه‌و كاته‌ی به مێردی ده‌ده‌ن رایده‌گرن و وه‌كوو كچی خۆیان به‌خێوی ده‌كه‌ن...
میرد كردن به‌دبه‌ختی و ته‌نیایی ئه‌و زۆرتر ده‌كا و چوون مناڵی نابێ زوو ته‌ڵاق ده‌درێ...
لێمان ده‌پرسی : نه‌نه چه‌ند مێردت كردووه...
ده‌یگووت: نۆ مێردی مفید و مووخته‌سه‌ر!!!
7 مێردان ده‌كا و هه‌ر مێرده له سه‌ر نه‌زۆكی و بێ كه‌سی دوای مه‌ودایه‌ك جێی دێڵێ یان خۆی  ئامانی پێ هه‌ڵده‌گیرێ و جێیان دێڵێ...مه‌ودای نێوان ئه‌م مێردانه‌ش دێته‌وه ماڵی مه‌لای و یارمه‌تی مه‌ڵاژن ده‌دا كه مناڵی زۆر بۆ و هه‌میشه نه‌خۆش... وه‌ك ده‌ڵێین هیچ پیاوێك كاتی دروێنه و خوری ده‌ره‌قه‌تی نه‌نه خه‌یاڵ نه‌هاتووه و به ئازایی خۆی هه‌مووانی به‌زاندووه...
مه‌لا ژنی هه‌میشه نه‌خۆش و مینداڵدار بیر ده‌كاته‌وه ئه‌وه خه‌یاڵ زۆر ئۆگری مناڵه‌كانێتی و زۆریش یارمه‌تیده‌رێتی و نه‌زۆكیشه با نه‌‌هێڵێ چی دی شوی بكاته‌وه و جورێك راێگرێ له لای خۆی!! بۆیه ئه‌و كاته‌ی خه‌یاڵ به ته‌مای مێرد كردنه‌وه‌یه، داوای ده‌كا بۆ مه‌لا و ده‌ێكاته هه‌وێی خۆێ!... ئاوا ده‌بێ كه نه‌نه خه‌یاڵ ده‌بێته نه‌نكی من!
 نه‌نه خه‌یاڵ سه‌هله باب و مامه‌كانم، خوشك و برا گه‌وڕه‌كانی منیش به‌خێو ده‌كا و له دایكه‌كانیان باشتریان پێ راده‌گا... بۆیه هه‌موو نه‌نه‌یان خۆش ده‌ویست... دوای مردنی مه‌لا، نه‌نه خه‌یاڵ داواكاری ده‌بێ و نه‌نه دیسان له ته‌مه‌نی 70 ساڵه به بووك ده‌چێ ، به‌ڵام ئه‌و جاره زڕ مناڵه‌كانی جه‌یازی بۆ ده‌كڕن و كه‌سێكی ده‌بێ به سه‌ردان بێته‌وه لایان...
نه‌نه قه‌ت به بێ شیرینی نه‌ده‌هاته ماڵی ئێمه... مام حه‌وڵای ده‌نارد كه تازه‌ترین شیرینییه‌كانی خۆمایزی بۆ بكرێ و له بوخچه‌یه‌ك دا قودو شیرینی ده‌پێچاوه و به كۆمه‌ كۆم ده‌هاته ماڵی ئێمه... تا ئه‌و جێگه‌یه‌ی بزانم تاقه پیرێژنی مه‌شره‌ف خۆش بوو كه دانی زۆرتر له‌گه‌ڵ مناڵ و گه‌نجان ده‌كوڵا تا پیرێژنه‌كانی تر....
 ئه‌وه‌نده‌ی نه‌نه به‌دبه‌ختی و بێ كه‌سی دیتووه و ئه‌وه‌نده‌ی ئه‌و له ژیانیدا چه‌وساوه‌ته‌وه و كاری كردووه، هه‌ر كه‌س له جێی با ده‌فه‌وتا، به‌ڵام نه‌نه هه‌میشه دڵی به ژیانه‌وه خۆش بوو... چه‌ند ساڵ پێش كه زۆر نه‌خۆش بوو، بۆ داو و ده‌رمان بردمانه لای خۆمان ... له به‌ر ژان و ئازاری خۆی خه‌وی لێ نه‌ده‌كه‌وت، گووتم نه‌نه فیڵمت بۆ دانێم چاوی لێ ده‌كه‌ی؟ گووتی فیڵمم ناوێ گۆرانیم بۆ دانێ... گووتم ده‌نگی كێت پێ خۆشه؟ گووتی هی ئه‌و كچه‌تیوه فرتۆله "گوگوش"... دڵم پێی روون ده‌بێته‌وه، ئه‌وه‌نده ناسك و نازداره، ئه‌گه‌ر مردیشم هه‌ر گۆرانی ئه‌وم بۆ دانێن له گۆڕ دا ده‌حه‌سێمه‌وه...
نه‌نه رۆحت شاد.. ئه‌گه‌ر له لات بام گوگوشم بۆ داده‌نای بحه‌سێیه‌وه...
 

دوای پیاسه‌ی نێوان چه‌ند وێبڵاگ فاڵی مامۆستا هێمن ئه‌وه‌ی هێنا!

له مه‌ێدانی شه‌ڕانخێوی خه‌بــــــــــاتی قه‌ڕنی بیسته‌مدا
سه‌رم سوڕما كه ئه‌سپی شۆڕه‌سواری كوردی بۆ وه‌ستان

وه‌ڵامی دامه‌وه پیرێكی ئازاده‌ی جیهـــــــــــــــــــــــــــــــاندیده
خه‌تای سواران نه‌بوو پێش سواره‌كانمان قوڕس و ناوه‌ستان

........