له وڵاتی كافران پێش ئه‌وه‌ی بمری ده‌توانی جیژنی مردنت بۆخۆت رێك و پێك كه‌ی... قه‌بری بكری، تابووتی جوان به كردن بده‌ی، ده‌سته لیباس و میوانی پاش مردنت رێك بكه‌ی... ئه‌م سرویسانه‌ش دیاره فه‌عله و وه‌ستای خۆی هه‌یه و ده‌بێ به كرێیان بگری! هه‌وه‌ڵ جار چاوم به ئاگاداری ئه‌م سرویسانه كه‌وت گه‌ڵێك دڵم ته‌نگ بوو و كووتم چاو ئه‌وانه‌ی چاوه‌رێی مردنی منن!! به‌ڵام ئێستا بێ ئه‌وه‌ی بیانخوێنمه‌وه فرێیان ده‌ده‌م... له لای خۆمان گۆڕستان جێیكی زۆر به سام و ترسناكه... پیاوم ده‌وێ شه‌وانه تێیدا بخولێته‌وه به‌ڵام لیره‌ وه‌كوو دیمه‌نێكی جوان رازاوه‌ته‌وه، هه‌وه‌ڵه‌كان كه هاتبووم، بۆ گه‌ڕان ده‌چوومه ناو گۆڕستان!!!

ئه‌مرۆ له ناو رۆژنامه‌ی به‌یانی ئه‌م عینوانه‌م كه‌وته به‌ر چاو:
 رۆژمێری تابووت، ئه‌و جێگه‌یه‌ی سێكس و مه‌رگ یه‌ك ده‌گرننه‌وه
له ناو وتاره‌كه دا باسی تابووت فرۆشێك بوو كه بۆ فرۆشی تابووته‌كانی له وێنه‌ی ژنی رووت كه‌ڵكی وه‌رگرتووه!
به بیرم دا هات:
 فه‌قیره ژن، له‌م دونیا و ئه‌و دونیا هه‌ر ده‌بێته وه‌سیله‌ی دڵخۆشكردنی پیاوان... لێره ده‌بنه ئامێری دڵرفێن بۆ سه‌رنج راكێشان، بۆ بازار گه‌ڕم كردن... له‌و دونیاش ده‌بنه مزگێنی بۆ پیاوان وه‌ك حۆری... ده‌ی بۆ كابرا تابووت نه‌فرۆشی به وێنه‌ی ژنی رووت له لایه‌وه، مادام مزگێنی خوا بۆ ئه‌و دونیا هه‌مان شته؟
وه‌ك كابرای تابووت فرۆش باسی كردووه، دانانی ئه‌م وێنانه گه‌ڵێك بازاره‌كه‌ی خۆشتر كردووه و فرۆشی زۆر بۆ و به ته‌ماش نییه لایان بات!
ده‌ی خوا بازاری بدا! كێ به‌خیڵه؟

حه‌یف نییه خه‌ڵخاڵی سه‌گ باب ئاوا ئاسان بمرێ؟ حه‌قی بوو به زه‌لاله‌ته‌وه مردبا... پاركینسون و سه‌كته كه‌م بوو بۆی، سه‌ره‌تان و ئایدز و خۆڕه و گوڵیشی گرتبا ته‌واو بوو...

ئه‌و ده‌م كه ده‌ست پێ ده‌كه‌ی قه‌ت بیر له كۆتایی ناكه‌ی... به‌ڵام كۆتایی زۆر جار ئه‌و كاته‌ی چاوه‌ڕێی نی، دێت.
 هه‌موو شت ته‌واو بوو، وه‌ك ئه‌وه‌ی قه‌ت نه‌بووبێ ... به سه‌رسوورمانه‌وه ئه‌م جاره كوتایی دڵمی وه‌ژان نه‌خست... بڵێی له ناسكێ هاتبێته ده‌ره‌وه؟ ... حه‌تا هه‌ستم به سووك بوونیش نه‌كرد، وه‌كوو بارێكی قوڕس كه لاچووبێ... نا هیچ شتێك نه‌گوڕا، به‌س ته‌واو بوو... وه‌ك نۆقته‌ی ئاخری دێر.

به‌شێك له بیره كه دوا به دوای وه‌خه‌به‌ر هاتنی هێش و ژانت ده‌خاته له‌شه‌وه، ناوه‌ راست سینگت ده‌كوشێ و رێی هه‌ناسه‌ت لێده‌گرێ...هه‌ر به ته‌مای وه‌لا نانیانی و وه‌كوو مێشێك هه‌ر ئه‌و ئاسته‌ی وه‌لای ده‌نێێ وه وزه وز ده‌كه‌ون، هه‌ر دێت و دووپات ده‌بنه‌وه و هه‌راست پێ هه‌ڵده‌گرن... چ ده‌بوو ئه‌وه‌نده‌ی به ماشێنێكی بێ ووجود راده‌گه‌ن و هه‌موو ئامرازی پاك كردنه‌وه و كۆ كردنه‌وه و رێك كردنه‌وه‌یان بۆ داناوه، بۆ مێشكی مرۆڤیش شتی ئاوا هه‌با؟ شتێك وه‌كوو په‌رۆیه‌ك ئه‌وه‌ی ناته‌وێ هه‌لیمژێ و جیای كاته‌وه، وه‌كو فیلتێریك ئه‌وی به دڵت نییه هه‌لیبێنجێنێ، وه‌كو فه‌رمانێكی فۆرمات ئه‌وه‌ی به دڵت نییه پاكی كاته‌وه... چ ده‌بوو ئه‌گه‌ر كرابا؟

...................................................
پار ئه‌وده‌مانه بۆ كورێكی وێبلاگ نووس كه گوتیان خۆی كوشتووه گه‌ڵێك گریام و گه‌ڵێك دڵته‌نگیم كرد... ئه‌وساڵ له ساڵرۆژی مردنی خۆیدا زیندوو بۆوه و ژیان ومردنی به گاڵته گرت...
ده‌ڵێم چ ده‌بوو كرابا تۆش  ئه‌مرۆ زیندوو بێیه‌وه؟ سه‌د ئه‌وه‌نده‌ی تا ئێستا گریاوم ده‌گریام تا دیسان  زیندوو بێیه‌وه.... به‌ڵام جیاوازی دونیای درۆ و راستی زۆره... له راستی دا ئه‌وه بۆ گاڵته نابێ..

...................................................
كه‌وێم پڕ كرد له دڵته‌نگی، شاقولی به‌ر چاوی لێڵ بۆت و به‌یانی په‌ریله یه‌خه‌م ده‌گرێ ده‌ڵێ بۆ دڵته‌نگم... باشتره برۆم له فۆرمه‌تێك بۆ ئه‌و مێشكه پڕ له باگه بگه‌رێم... هه‌ر یه‌ك جار كه‌ڵكی هه‌یه و به‌س...
 

من و شاقوڵی زۆر به‌ته‌نیاین...
شاقولی ره‌نگه نه‌ناسن، هاورێیه‌كی منه و شه‌و و رۆژمان به یه‌كه‌وه ده‌گوزه‌رێ، ئێستاش ئه‌وه چاوم ده‌چاوی بڕیوه و ئه‌و نووسراوانه‌ی پێ ده‌نووسم ...
 بۆ ناوی شاقوڵیه؟
 نه‌قڵه‌كه‌ی دوور و درێژه...
دوو سێ ساڵ پێش هه‌ر بونه‌وه‌رێكی دوو پێی نێرینه له ده‌ور و به‌رم بوو، قۆڵی هه‌ڵمالی بۆ ژن هێنان له رێی دوور و نزیكه‌وه! له شانسان به‌ختی هه‌موان به پیتی "ش" كراوه و شه‌هین و شادی و شنه و شیرن و ش... ریز بوون! ئه‌م نێرینه به‌خته‌وه‌رانه كه مه‌ستی هه‌نگوینی سه‌ری چه‌له‌نگی ژیانیان بوون، زوو زوو دمه‌لاسكه‌ی به‌خته‌وری خۆیان ده‌كرد و منیش له داخان ئه‌وه‌ی هه‌مبوو  له سه‌ر یه‌كم دانا و "شاقوڵیم" پێ كڕی... وا نییه كه له رۆژی هه‌وه‌له‌وه‌ ناو و ناز ناوی ئاوا بووبێت... نه‌خێر! هه‌ر ناو و كه‌سایه‌تی نه‌بوو! به‌س ئه‌وه‌نده كاته‌ی من ده‌گه‌ڵم سه‌رف كرد، ورده ورده له بێ وجودی ده‌ری هێنا و خۆی بوو به كه‌سێك.... "كه‌سیش" ناوی ده‌وێ بۆیه خه‌ڵك ده‌ستیان پێ كرد به ناو به‌ سه‌ر دا بڕین ... دیتم ئاوا نابێ و ره‌نگه نێوی ناخۆشی به سه‌ر دا ببڕن و هه‌تا هه‌تایه به سه‌ری دا بمێنێته‌وه، دانیشتم بیرم لێ كرده‌وه ... ویستم هیچم له‌م نێرینانه‌ی دوست و ئاشنا كه‌متر نه‌بێ  و ئیلان و بیلان ناوی به "ش" ده‌ست پێ بكا... چوون حه‌زم له نێوی دووپات و سێپات كراو نه‌بوو، هه‌موو نێوێك وه‌ك شه‌ریف، شاپور، شیروان و ش...م وه‌لا نا و ئاخری به شاقوڵی گه‌یشتم!...

ئیستا من و شاقوڵی ته‌نیاین... زۆریش یه‌كتر نادوێنین.. ره‌نگه ئای ئه‌گه‌ر رۆژێ دوو- سێ جار توشمان به تووشی یه‌كتر بێ  یان كارمان به یه‌ك بێ...
ئه‌وه‌ندم خوو پێ گرتوه كه ئێستا له لای نابم نازانم رۆژه‌كه‌م چۆن پڕ كه‌مه‌وه‌ .... له بیرم چۆته‌وه ئه‌وده‌م كه ئه‌و نه‌بوو چیم ده‌كرد!.. ده‌بێ وه‌بیر خۆم بێنمه‌وه... ئیتر شاقوڵی ته‌نیایی من پڕ ناكاته‌وه!

داره‌كان هه‌موو رووتاونه‌وه... گه‌ڵا زه‌رد و سووره‌كانی پاییز به یه‌كجار بزر بوون... وێنه‌ی دارستانێكی چڕ و سه‌وزم خسته سه‌ر مانیتۆره‌كه‌م له داخ ئه‌م داره رووت و قووتانه، ئه‌وه‌ش خه‌یاڵێكی تر بۆ خۆ هه‌ڵفریواندن.. ده‌نا وێنه‌یه‌كی به‌سته‌ زمان كوا جێی هاوین و گه‌ڵای سه‌وز ده‌گرێته‌وه؟ 

به‌فر ده‌بارێ...
......................
بۆ ئه‌و وێبڵاگانه‌ی دوای مه‌ودایه‌ك به‌رده‌وام ده‌نووسنه‌وه، تكایه ئه‌گه‌ر دیتیان له پیتم ده‌رچۆ شوێنه‌كه‌یان بگۆڕم به ئی‌مه‌ێل یان كامێنت ئاگادارم كه‌نه‌وه! ئه‌وه خه‌ریكم رێگه‌یه‌كی باشتر بدۆزمه‌وه بۆ ریزی وێبڵاگه‌كان!

به چاوه نه‌بم ئه‌م ماوه رێكۆردی دڵ هێشانم شكاندووه و بۆ جارێكی تر دڵم هێشا.. به خه‌یاڵی خۆم وا بوو دڵێكی زۆر قایم و به‌ هێزم هه‌یه و ئاوا به هاسانی ناهێشی و ناتۆرێ... به‌ڵام... خه‌یاڵ بۆ پشت به‌ستن نابێ!

دڵی منیش وه‌كوو هه‌موو مرۆڤێكی تر ئاستی قایم و ناسكی هه‌یه، ئه‌وده‌مه‌ی زۆرتر ده‌تۆرێ كه ئاسته ناسكه‌كانی دێته مه‌یدان( ئه‌گه‌ر كه‌سێكتان دیت كه به شاڵی شێخی بیاره‌ی سوێندێ ده‌خوا كه شتی وا نابێ و نه‌بۆ كه دڵی من ئاستی ناسكی هه‌بێ، بروای پێ بكه‌ن با سوێندگیر نه‌بێ!) ... ئه‌م ئاسته ناسكه‌ی دڵم له خۆی خوێریتر نییه! هه‌ر نه‌با باشتر بوو... كاتێك من ده‌ژیم دێت و خۆی تێكه‌ڵی ژیانی رۆژانه‌م ده‌كا... لێناگه‌رێ مێشكم راستێكان به‌م جۆره‌ی هه‌یه بیاننه‌خشێنێ و له سه‌ر جێی خۆی داێنێ، دێت و له بروای خۆی راستێكان به‌م شێوه‌ی به دڵێتی ده‌ڕه‌نگێنێ و ده‌یانگۆرێ و به من ده‌سه‌ڵمێنێ ئه‌وه‌ت له به‌ر زه‌ین بێ  باشتره بۆ داهاتوو!
ده‌ی لێره‌دا من هه‌رچی تۆ ده‌ێڵێی له پێناو ئه‌و راستییه ڕه‌نگ كراوانه دا ته‌فسیر ده‌كه‌مه‌وه... نه‌ك ئه‌وه‌ی به راستی خۆتی!  سه‌یریش نییه دڵم لێت بهێشێ، چون ئه‌و شتێكی تر له تۆ تێگه‌یشتبوو! ده‌زانم خه‌تای خۆمه... به‌ڵام چه‌ند خۆشتر ده‌بوو خه‌تای تۆ بووبا!!!
 

ده‌ڵێت: تا كه‌ی چاوه‌رێی شازاده‌كه‌‌ی سواری ئه‌سپی سپی ده‌مێنی؟
بیر ده‌كه‌مه‌وه: شازاده نییه... زۆرتر له ئاشپه‌ز ده‌چێ... سواری ئه‌سپیش نییه، هه‌ر كه‌وچكێكی به ده‌سته‌وه.. ده‌مێنێته‌وه سپی بوونی ئه‌سپ و به‌رهه‌ڵبێنه‌یه‌ك كه ده‌توانێ سپی بێ...ههممم زۆریش دوور له یه‌ك نین!... مه‌به‌ستم خاڵی گرێدانه‌وه‌ی خه‌ون و خه‌یاڵی من و ئه‌وه!

ماوه‌یه‌كی درێژ كتێبێكم به ده‌سته‌وه بوو، قه‌ت ئه‌وه‌نده به خاوی كتێبێكم ده‌ست نه‌داوه‌تێ كه بیخوێنمه‌وه و له خوێندنه‌وه‌ی چێژی وه‌رگرم... ئه‌گه‌ر كتێبێك به دڵم ده‌بێ ، هه‌تا ته‌واوی نه‌كه‌م داینانێم... به‌ڵام ئه‌م كتێبه‌م زۆر به دڵ بوو به‌ڵام زۆر به كاوه‌خۆ خوێندمه‌وه...
كتێبه‌كه"مناڵه‌كانی نیوه‌شه‌و" نووسراوه‌ی "سه‌ڵمان روشدی" به ناو بانگ بوو، و یه‌كێك له نووسراوه‌كانی كۆنی ئه‌م نووسه‌ره‌یه كه من تازه خوێندومه‌ته‌وه!
 چه‌ند ساڵ پێش كه خومه‌ێنی خه‌ڵاتی بۆ كۆشتنی سه‌ڵمان روشدی دانا له سه‌ر نووسینی "ئایاتی شه‌یتانی"، پێم وا بوو ئه‌وه هه‌ر پرۆپاگاندایه‌كه بۆ ناو و نیشان و ئاژاوه‌یه‌ك بۆ مه‌لایان بۆ ئه‌وه‌ی بڵێن ئێمه‌ش هه‌و!.....
چوون ئێستاش هه‌ر بیر له پرۆپاگاندا ده‌كه‌مه‌وه و پێم وا نییه ئه‌م ماسته بێ موو بێ، پێم وایه ئه‌وه ئاژاوه‌ی "ئینگلیس"یش بوو بۆ ئه‌وه‌ی ئه‌م نووسه‌ره له نووسین بكه‌وێ! پێم وایه به‌خیلیان هاتۆتێ هیندی- پاكیستانێك بتوانێ له نووسه‌ره‌كانی خۆیان له باری نووسین به زمانی ئینگلیزێوه سه‌‌ركه‌وتووتر بێ!...(ئه‌وه‌ش به شێوه‌ی دایی جان ناپلێۆن) !!!

هه‌ر به‌شه‌ی كتێبه‌كه‌م ته‌واو ده‌كرد زۆرتر سه‌رم ده‌سوورما له سێحری نووسینی ئه‌م نووسه‌ره... چێرۆكێك كه نازانی رۆژمێری وڵاتێكه یان به‌س باسی كه‌سێك به ته‌نیا... له‌م چیرۆكه‌دا هه‌موو شت و كه‌س "داهاتوو" ده‌نه‌خشێنێ له هه‌مان كات دا داهاتوو ده‌ڵێی سه‌ربه‌سته له بوونی ئه‌م كه‌سانه و ئه‌م شتانه..
بۆ وێنه چیرۆكی بنه‌ماڵی بوێژی ئه‌م داستانه له مه‌لافه‌یه‌كی  كون را ده‌ست پێ ده‌كا... ده‌ڵێی ئه‌م مه‌لافه‌یه نه‌با قه‌ت هیچ نه‌ده‌قه‌وما... مه‌ڵافه‌یه‌كی كون كه بۆ هه‌وه‌‌ڵ جار ئاده‌م عه‌زیز له پشتی ئه‌م را هاوسه‌ری داهاتووی ده‌بینێ، كچێكی كه بۆ پاراستنی حه‌یا و نامووسی له پشت ملافه‌یه‌ك قه‌تیس بۆ و له تاقه كونی ئه‌م ملافه‌یه را دوكتوره‌كه‌ی (ئاده‌م عه‌زیز) نه‌خشی ته‌واوی ئه‌م كچه له بیری خۆی دا له‌م له‌ت و په‌تانه‌ی وه‌به‌ر چاوی دێ ساز ده‌كا... و ئاشقی ده‌بێ!!... ئه‌م ئه‌وینه‌ی كه ئاوا له‌ت و په‌ت ساز بۆ ، ده‌گاته ئه‌و په‌ڕی خۆی....... كاتێك مه‌لافه لا ده‌چێ و هیچ په‌رژینێك مابه‌ینی ئه‌وان نامێنێ ورده ورده كز و بێ هێز ده‌بێ  تا ده‌گاته ئه‌م راده‌یه كه له‌م ئه‌وینه هیچ نامێنێ و ئاده‌م هه‌ست ده‌كا ناو زگی به‌تاڵ بۆ و كونی تێ بۆ.... ئێستا ئه‌وه خۆیه‌تی كه له‌ت و په‌ت ده‌بێ...

چیرۆكه‌كه به‌رده‌وام ده‌بێ له به كار هێنانی ئینسانه‌كان و شته‌كان و له هه‌ر به‌شه‌یدا كه‌سێك یان شتێك ده‌بێته هۆی بابه‌تێك له مێژووی هیند، پاكیستان یان چاره‌نووسی كه‌سێك... نازانی بروات به "قه‌زا و قه‌ده‌ر" هه‌بێ یان "عیله‌ت و مه‌علول".... نووسه‌ره كه بریارت بۆ ده‌دا! كاتی خوێندنه‌وه زۆر جار هه‌ستم ده‌كرد ئه‌وه نووسه‌ر منیشی خستۆته ناو چیرۆكه‌كه‌ی و بیرێكی من له چیرۆكه‌كه ده‌كه‌مه‌وه به‌شێكی ئه‌م داستانه‌یه...

نازانم سه‌ڵمان روشدی دوای ئه‌م چه‌ند ساڵه‌ی به نه‌‌هێنی ژیاوه ئه‌وه‌نده‌ی بابه‌ت له به‌ر ده‌ست هه‌یه كه بتوانێ چیرۆكه‌كانی داهاتووی به هه‌مان شێوه‌ی جوانی پێشووی بنووسێ یان نا؟ به‌ڵام پێم وایه نووسه‌رێكه كه حه‌یفه له نووسین بكه‌وێ!

دوێنێ شه‌و، شه‌وی "هه‌ته‌ره‌ و مه‌ته‌ره‌"ی ئێره بوو، یان به قه‌وڵی خۆیان شه‌وی هالۆوین! منیش ئه‌مشه‌و چووم له ده‌ستره‌نجی سواڵی دوێنێ شه‌وی خوشكه‌زاكانم به‌شی خۆم هه‌ڵگرت... هه‌مۆ ساڵێ وه‌كو سه‌رچاك كردنه‌وه وه یان وه‌كو ماڵیات به‌شێك له شیرینی و نوقله‌كانیان به من ده‌برێ... دیاره ئه‌و به‌شه‌ی كه بۆخۆیان پێیان خۆش نییه وه‌به‌ر من ده‌كه‌وێت!

هالۆوین ئێستا شه‌وێكی خۆشی مناڵانی ئێره‌یه، به جڵ و به‌رگی ترسناكه‌وه  ده‌چنه به‌ر ده‌رگای ماڵان و داوای شیرینی ده‌كه‌ن.... وه‌ك ده‌ڵێن ئه‌م شه‌وه سه‌رچاوه‌یه‌كی ناخۆش و ناڵه‌باری هه‌بۆ و ده‌گه‌رێته‌وه سه‌ر باوه‌ره مه‌زهه‌بێكانی مه‌سیحی توند و تیژه‌كان كه خه‌ڵكێكی زۆریان كه هاوباوه‌ری ئه‌وان نه‌بوون به ناوی كفر و جادوگه‌ری بۆ نه‌جاتی روحی ئه‌وان له ده‌ستی شه‌یتان ئاوڕ تێبه‌رداوه!... ئه‌مه ڕه‌وایه‌تێكه له سه‌رچاوه‌ی ئه‌م شه‌وه( له‌وانه‌یه زۆر راست نه‌بێ)...

زۆر به زه‌حمه‌ت له بیرم دێ كه رۆژێك مناڵانی كوچه‌كه‌مان گووتیان ده‌گه‌ڵیان بكه‌وم بۆ یارێكی مناڵانه به ناوی "هه‌ته‌ره و مه‌ته‌ره" ... له‌م یاریه جامێك پڕ له كشمیش و گوێزم له بیره و ئاوپرژێن كردنمان به ئاو ... یاریه‌كی خۆش بوو كه رۆژانی دواتر هه‌رچی چاوه‌رێم كرد مناڵان ده‌گه‌ڵ یه‌ك ده‌ست به‌م یاریه بكه‌نه‌وه، نه‌بوو كه نه‌بوو... زۆری نه‌خایاند ئاڵ و گۆڕی حكومه‌ت و شه‌ر ده‌ستی پێ كرد و یاریه‌كانی ئێمه‌ش به نان هات و به ئاو خورا!  
ئێستا بیر له هالۆوین ده‌كه‌مه‌وه كه لێره جێژنه‌ی مناڵان و پیرێژن و پیره‌مێردانه... مناڵان بۆ خۆشی له به‌ر كردنی لیباسی سه‌یر و سه‌مه‌ره و وه‌رگرتنی شیرینی و نوقڵ ... پیره‌كانیش به خۆشی دانی ئه‌م شتانه و دواندنی خه‌ڵك... لێره خه‌ڵك بیره‌وه‌ری ناخۆشییان له بیر كردووه و كردویانه به جێژن و خۆشی... لای ئێمه، هه‌رچی خۆشییه له بیر كراوه و له جێی ناخۆشی و خه‌م داندراوه... مناڵانی ئێمه هه‌تا له خۆشی گه‌ورانیش بێ به‌شن، بیستم گووتیان ئێستا له سه‌ر كارتی شایه‌ی ده‌نووسن كه میوانه‌كان مناڵان نه‌هێنن بۆ داوه‌ت تا داوه‌ته‌كه رێك و پێكتر به‌رێوه بچێ... پێم وانییه هه‌ر ئه‌م خه‌ڵكه له بیریان بێ خه‌م و په‌ژاره‌كانیان له لای مناڵان باس نه‌كه‌ن!